كلية الحقــوق و الأمراض النفسية

السلام عليكم و رحمة الله و بركاته

تنبيــــه : الموضوع عبارة عن تحلطم × تحلطم × تحلطم فاللي ما له خلق لا يكمل =!

في موضوع شاغل بالي من زمان لما قريت موضوع ماكنتوش و موضوع مدام Yin قلت خلاص لازم أفضفض بروحه قلبي متروسة من زمان و على وشك الانفجار و السبة هالسالفة ..

من أيام المتوسطة ليمن آخر يوم لي بالثانوية و على الرغم من نظام التدريس اللي ماكو أتعس منه كنت حاطة ببالي هدف ومصممة عليه إني أدش كلية الحقوق مهما كلفني هالشي ما كان هدفي أصير محامية و لا محققة و لا أول قاضية بالكويت بس أبي أدش الحقوق .. لأني مولعـــة بشي اسمه قانون كنت أتمنى أفهم شنو الدستور والقوانين، أحس إنه القانون و النظام مسيطرين علي من صغري لدرجة إني اشتهرت بين رفيجاتي إني أكره أي شي يصير مو بوضعه الطبيعي مثلا خل وحدة تخطر الطابور عادي أهزئها أكون مع رفيجتي بالسيارة و تبتون و تخطر السيارات اللي بيمشون قبلها آكـلـهــاااا و مرة أبلة العربي زايدتني بالامتحان درجة غلطت بالعد و زادتني ما نقصتني لأ زادتني جان أروح أعلمها >> أمي بغت تقتلني على هالحركة .. بس أنا لي ألحين أفتخر إني سويت هالشي على الرغم من صغر سني و الله يهديها نحيسة شالتها المفروض تخليها تشجيعاُ لي على أمانتي =).. عموما هالشي يمشي بدمـــي و كان كل يوم يزيد حبي له (( أي النظام و القانون;Pp))

لي ألحين أذكر آخر سنة لي بالثانوية و لما انخفض معدلي و انصدمت إنه خلاص الحقوق ما عادت تقبلني فوري كنت متحطمة، أبوي و أمي و الأوادم كلهم يواسوني و يقولون ما عليه دشي آداب و بعدين حولي لي الحقوق >> شمعنى الآداب ما أدري !! و أنا آعييييييط على قولة عادل إمام >< .. المهم رحت و سجلت على أمل القبول الـ مو فوري (ما أدري شسمه =× )وطول العطلة أحاتي ليمن وصلني المسج (( مبروك تم قبولك في كلية الحقوق )) ..

ما أنسى مقابلتي الشخصية كانت تاريخ 12\9 أول أسبوع في رمضان .. طحت بإيد دكتور يعرف عمي حيييل ياهو فصفصني بالأسئلة و التفلسف نشف ريجي بصراحة ..الظاهر حاقد على عمي=$ و الحمد لله انقبلت رسمياً

أول سنة 6 مواد و الله ما أجذب عليكم إن قلت بس 2 من اللي درسوني أهم الصاحين أما الباجي الله يخلف عليهم و انتقلت بعدها لي سنة ثانية و أنا أعاني من ترسبات النظام التعليمي البائس في جامعة الكويت و نفس السالفة دكاترتي 1 فقط اهو الصاحي الباجي هم الله يخلف عليهم و يصبرني !! ألحين جينا للمهم نماذج الدكاترة اللي صادفتهم خلال سنتين فقط من دراستي :

أولاً لازم نذكر الثلاث دكاترة السنعين و بعدين أقول لكم عن البقية .. الأول ما أدري شنو الكلام اللي يوفيه حقه و الله خذيته قدوة لي في هالمجال و إن شاء الله يوم من الأيام أكون مكانه و أدرس الطلبة و أقول لهم إني لما كنت مكانكم دكتوري ((خليفة ثامر الحميدة)) أثر علي و خلاني أحب القانون الدستوري خصوصاً ، و إن شاء الله أصير خبيرة دستورية لي تخرجت >> أستغل الفرصة دام ماكو كويتية متخصصة بهالمجال ;Pp ، كثير كانوا ينتقدونه بس اللي جربته و شفته إنه صج يستاهل يكون دكتور قانون دستوري على الأقل يحترم الطالبة أياً كان أصلها أو فكرها أو طائفتها و يعاملها على إنها بنية عمرها 18 و فوق مو جاهل بالروضة وما يفرق لا بالعلامات و لا بالتعامل و هالشي عانيت منه هالسنة

الثاني دكتور ياسر الصيرفي .. طبعا سجلت عنده حسبالي كويتي و انصدمت إنه مـصـري و اكتأبت و سويت هوليلة إلا أحول من عنده بس ما حصل لي وقتها كنت أبي كل دكاترتي يكونون كويتيين –عاد جنهم ينفعون !!- .. هالدكتور طلع أحسن منهم كلهم باستثاء الحميدة .. آخر محاضرة عطانا إياها كانت حزينة =( و طبعا في ناس بجوا .. صج هالإنسان ينفقد لأنه محـتـرم و راقــي بالتعامل..

الثالث دكتور محمد بو زبر ماخذة عنده مادة قانون جزاء عام هالسنة طبعاً ما كنت بالعة المادة لما شفت الكتاب و بداية السنة ما تحمست بس مع الأيام حبيتها بسبة الدكتور كافي إني لأول مره بالتاريخ صرت أوصل الكلية @7 و المحاضرة @8 بس عشان ما أتأخر على محاضرته =) .. مع إني الكورس الأول بدعت بالغيابات أسبوع أحضر و أسبوع أطنش بس تغاضى عن هالنقطة و هذا أحلى شي فيه لأني إنسانة تأثرت برفيجتي اللي ما تتسمى و صارت هوايتي مثل هوايتها أكشت بالمحاضرة حتى لو كنت بالكلية عادي أقعد بالاستراحة أقرى كتاب و أشرح لها _ اهي و القراءة أعداء من زمان - و لا أرتز باللوبي و سوالف و ضحك مع رفيجاتي و المحاضرة بالطقااق اللي يطقها فمسألة المحاسبة على الغيابات حيييل تهمني > واضح !


نجي إلى الشسمونه الثانيين

سنة أولى من كثر ما اهمه شنيعين و يلوعون الجبد و كرهوني بعيشتي و خلوني أشك بعمري ماني كاتبة عنهم لأني لو بديت ما خلصت ="(

سنة ثانية الدكتور الأول يعطيني قانون [....] هالدكتور استخف إلا شوي !! احنا كلنا معدين سنة أولى و مكتوب إنه نجحنا بمادة دستوري بس لي ألحين مو فاهمين ليش الأخ من أول السنة لي آخر محاضرة و اهو قاعد يشرح لنا قانون دستوري و كاشت بمادته !! إي ليييش ؟

طبعا شرحه مو صاحي يعني بين كل جملة و الثانية يوقف بو دقيقتين 3 يطالع السقف@@ و البنات اللي جدامه ما يهمونه يعني أسلوبه بارد و تعيس يحسسني إن احنا و الكراسي واااحد !! و يا حبه حق التحكك >< من يدش المحاضرة ليمن يطلع و اهو يتحكك و الله ينررررفز على هالحركة إيده ما تثبت يا يحك راسه يا جتوفه يا أقدامه >> من صجه يتسند على الطاولة و يرفع رجله و يحك أقدامه ويع ينرررفز ينرررفز !! و بما إنه طويل العمر ما ياخذ غياب .. فمنو يقول إنه مو كاشتين بأم المحاضرة و ما نحضر إلا بالشهر مرة ؟ و منو يقول إنه ما يحضر عنده إلا 5 بنات و مرات وحدة و هم يصر على الشرح و يقعد يشرح لها مسكينة =$ المشكلة طلع آخر شي حافظ أشكال البناااات عدل مدل حتى لو بين 100 بنية ينقشنا و يعرفنا جااااان ننصدم طبعاً اهو كل يوم يطلع من المحاضرة يشوفنا برى قعدة و سوالف فأشكرى أعمال السنة بيحط لنا 0 (دويحة P= ) بس شنسوي و الله ما نطيقه و لا نطيق مادته كرهنا فيها غصب

والمشكلة حاط علي حطة لأن الأخ مو عاجبته عايلتي إي شسوي أزور اسمي عشان حضرتك ترضى !! و كل ما جابوا طاري الفرعيات يلف علي ينطرني أعلق ودي أعرف اهو شاك إني نازلة بفرعية@@ عشان أنزل تصريح أنفي الإشاعة وأفك عمري لا و بعد مو راضي يعطيني امتحان مؤجل يقول بعطيج 0 ما فيج شي ليش ما حضرتي أمبيه مريضة وعندي طبية ويوم الامتحان دارسة بس صج تبهذلت من التعب و ما دشيت شنو الإنسان يمرض بمزاجه !! .. هالدكتور ما راح أخلص من التحلطم عليه لي آخر يوم بحياتي بتحلطم و أتحلطم و أتحلطم بسبته ..


و دكتورة ثانية هذي للأسف من نمونة اللي ياكلون و يمشون إيدهم بالطوفة :@ الكورس الأول هوايتها تطب و تمصخر السعوديين اهيا كانت تشتغل هناك وفي معانا طالبة سعودية بعد قلبي تحطمت تقول ودي أرد عليها بس أخاف تحط علي

يعني طلعتهم من أكلة لحوم البشر مصورتهم بصورة تخرع و البنات الخبول مصدقينها يقولون صج دكتورة ؟ تقول آآآآ و اللهي أنا كنت بشتغل هناااك .. انزين يا مال الصلاح يوم إنج كنتي بتشتغلي هناك و 20 سنة على قولتج شقعدج و صبرج عليهم! جان رديتي ديرتج

أنا مو باط جبدي إلا إني متأكدة إنها يوم من الأيام بتخلي الكويت و تروح دولة ثانية و هم تقعد تطب فينا و فبناتنا مثل ما مسخرت السعوديين .. و بما إنها أي بنت تناقشها تخسف درجتها فأنا للأسف مخسوفة درجتي و خالصة لأني مرة رحت مكتبها و كلمتها على هالموضوع ما يصير محاضرة تروح على مغامراتها يوم كانت بالسعودية و احنا نبتلش و المحاضرة اللي بعدها تشرح لنا 3 دروس مع بعض عشان ما نتأخر بالله شلون بنفهم زواج و طلاق و بلاوي متلتلة بمحاضرة وحدة=$ الله يهديييج بس ..

و الدكتور الثالث نفسي و منى عيني لو يطلع من سلك التدريس نهائياً و إلى الأبد لأنه صج متخلف بمعنى الكلمة .. الأخ يدعي إنه اهوا ليبرالي و علماني و متطور و من هالمصطلحات اللي أدري إنه اهوا يقولها و ما يدري شنو معناتها أصلاً لأنه ما يندري شيبي من الحياة أصلاً سبحان الله اهوا طالع بروحه كائن فكره و توجهه غريب عجيب

و من بداية السنة و اهو كل أسبوع هاب هبة جديدة أول السنة حط على الشيعة واااي شنو كانت حقبة زمنية كسيفة ما بقى لفظ خايس ما قاله كل كلامه قلة أدب و وقاحة و مرة قال عنهم تربيتهم قذرة أنا عيوني طلعت من مكانها @@ اعنبو غيرك مو كويتيين مثلك ؟ كويتيين تربيتهم يعني مثل تربيتك يعني إنت تربيتك قذرة !! طبعا لما قلت حق أمي السالفة قالت لا يمه بروح أكلمه ما يصير جذي لوووول انزين يمه حبيبتي إنتي شكو بالشيعة ما سبج و لا قرب صوبج قالت لأ هذا اليوم يسب الشيعة باجر يسب الكل و بعدين عيب إنتوا بكلية مو ديوانية يقعد يقول اللي يبيه >> و الله لو أمي تدرسنا بداله أبرك .. و المشكلة رفيجاتي شيعيات قلت لهم شتنطرووون دافعوا تحجوا ردوا عليه على الأقل حاجوه بمكتبه أنا احتريت إنتوا ما انقهرتوا قالوا مااااا نقدر يحط علينا بعدين =( >> يا حظي أسطوانة كل الدكاترة حسسسبي الله عليهم ،

خلص من الشيعة هب هبة بالسلف ما بقى شي ما قاله فيهم و المشكلة ينطر وحدة من البنات ترد عليه بس ماكو الكل يخاف منه لأنه أقشر و شراني و يخرررع يهزيء البنية يمسح كرامتها بالقاع و خلص من السلف دش بالإخوان اللي المفروض يرفعون عليه قضية >> بدت تشيش لوول .. لأ بس لما دش بالإخوان قام الأخ ياخذ راحته و يذكر أسماء و يحلل و ينتقد و قالب المحاضرة سيرة ذاتية لكل سياسي بالكويت !!


و دكتور ثاني حاط لنا امتحان درجته من 25 و المشكلة أعلى درجة بكل الشعب خذت 21 !! اهي الوحيدة اللي عدت العشرين ما شاء الله عليها

طبعا البقية كلنا 18 و تحت و رفيجتي حبيبتي واعليه عليها ماخذة 12=( أنا الحمدلله أهون من ربعي خذيت 18 و على إني أدش الامتحان التعويضي و أحسن الدرجة فرحت مكتب الدكتور عقب ما أعلن موعد الامتحان التعويضي و الأخ كان يحاجينا جنه احنا خدامات أبوه و بنفسية و يعطينا نظرات يحسسنا إنه غلطانين عليه و لا مسوين له شي من قبل ..

قلت له دكتور أبي أسجل حق الامتحان التعويضي قال إنتي فلانة الفلاني صح ؟ قلت إيه قال لأ ماكو ما تدشينه .. جان يلف كرسيه على جنب و يقول لي طلعي برى @@ >> و كان فيه بنات واقفين و يسمعونه !! هاللحظة حسيت نفسي خدامة صج

يعني شنو هالأسلوب وين التربية و التعامل شفايدة شهادتك إذا أخلاقك جذي طبعا طلعت و أدور أحد يتوسط لي أدش الامتحان التعويضي بس ما لقيت و يمكن خيره مع إني منقهره الامتحان التعويضي بعد خمس أيام ودي أدرس و أدش غصبن عليه بس أتوقع يكرشني يقول ما ادشين=(

إلخ إلخ إلخ من المصايب اللي عندنا من الكآبة أول السنة كنت بحول تربية أو آداب أو أي كلية ثانية المهم أنحاش بس أبوي أصر إني أتحمل و أكمل .. و مهما تحلطمت ما راح يفضى قلبي من هالحمقــــى اللي ربي قاردنا فيهم الله يهديهم =(


بالنهاية أنبهكم ياللي عندكم عيال و تبون مصلحتهم لااااا يفكرون مجرد تفكير يدشون كلية الفلس

لأنهم راح يتحطمون نفسياً و أكاديمياً و من كل النواحي طلبة حقوق بس ما نقدر نحصل على حقوقنا

ظلم بالدرجات و ظلم بالمعاملة و تفرقة بين بنت فلان و بنت علان و بين اللي حزبها الفلاني و طائفتها العلانية

و هالشي مو بالدرجات عشان ما أبالغ بس بالمشاركة بالمحاضرة و الكلام و الأسلوب يعني يحاجينا على إنه خدامات عنده بس لي دشت وحدة من اللي تبع حزبه و يعرف أبوها و لا مذهبه لااا تصير على العين و الراس و فجأة يصير خوش إنسان و يحجي مثل الأوادم !! ..و الامتحانات حدث و لا حرج

أخطاء بالتصحيح شنيعة نكتب إجابة بالضبط مثل الكتاب و يحطونها غلط مو نص الدرجة لاء بكبرها غلط و لي ناقشناه قال ماااكو خلاص حطيت الدرجة و انتهيت !!

اللي يبي حقوق يا كثر الجامعات اللي برى و فيها حقوق وعلى سنع مو مثلنا الحمد لله و الشكر .. ما أقـــول غير .. يا جامعة الكويــت متى على الله يحين فراقج؟